தமிழ் மக்களின் பிரச்சினைக்கு உறுதியான தீர்வைக்காண்பதற்கான தீர்வுத்திட்ட வரைபைக்கொண்டே தமிழ் தேசிய கூட்டமைப்பு பொதுத்தேர்தலில் தமிழரசுக்கட்சியின் வீடு சின்னத்தில் களமிறங்கியுள்ளதாகவும் இதன் மூலம் சர்வதேச சமூகத்தின் உறுதியான ஆதரவைக்கோர வடகிழக்கு மக்களின் ஆணையை கோரி நிற்பதாகவும் தமிழரசுக்கட்சின் தலைவரும் அக்கட்சியின் திருமலை மாவட்ட முதன்மை வேட்பாளருமான இரா.சம்பந்தன் தெரிவித்துள்ளார்.

நேற்று ஞாயிற்றுக்கிழமை திருமலை கல்விமான்கள் குழுவினர் முன்னாள் பாராளுமன்ற உறுப்பினர் துரைரெட்னசிங்கம் தலைமையில் சம்பந்தனை அவரது இல்லத்தில் சந்தித்து கலந்துரையாடினர்.

"தமிழ்த் தேசியம் பற்றி உரத்துப் பேசுபவர்கள் எதிர்வரும் தேர்தலில் யாழ்ப்பாணம், திருகோணமலை ஆகிய மாவட்டங்களில் மட்டுமே போட்டியிடுகின்றார்கள். வன்னி, மட்டக்களப்பு மற்றும் அம்பாறை ஆகிய மாவட்டங்கள் அவர்களின் தமிழ்த் தேசியத்திற்குள் வரவில்லையா? தமிழ் மக்கள் இது குறித்து யதார்த்தமாகச் சிந்தித்துச் செயற்பட வேண்டும்" என்று சம்பந்தன் தெரிவித்தார்.

இது தொடர்பில் சம்பந்தன் மேலும் கூறியதாவது;

இலங்கைத் தமிழரசுக் கட்சி எதிர்வரும் பொதுத் தேர்தலில் இரண்டு நோக்கங்களை முன்வைத்தே போட்டியிடுகின்றது. ஒன்று, தமிழ்மக்களிடமிருந்து உறுதியான ஆணையைப் பெற்று தமிழ்த் தேசியப் பிரச்சினைக்கு நிரந்தரமான, நிதானமான, நியாயமான உள்ளக சுயநிர்ணய உரிமையுடன் வரலாற்றுப் பாரம்பரியப் பிரதேசத்தில் சுயாட்சி ஒன்றை ஏற்படுத்துவது. இரண்டாவது துன்பங்களுக்குள்ளாகி நொந்துபோயிருக்கும் தமிழ்மக்களின் அத்தியாவசியத் தேவைகளை விரைந்து நிறைவேற்றுவது.

இவ்விரு நோக்கங்களையும் அரசியல் தீர்வொன்றின் மூலம் சர்வதேச சமூகத்தின் அனுசரணையுடன் அடைய வேண்டுமென்பதே எமது ஒரே நோக்கம். ஏப்ரல் 8 தேர்தலில் தமிழ்மக்களின் ஆணை எவ்வாறு அமையுமென்பதை சர்வதேச சமூகம் எதிர்பார்த்துக் காத்திருக்கிறது என்பதை வடக்கு,கிழக்குத் தமிழ்மக்கள் அனைவரும் உணர்ந்து எமது வாக்குப்பலத்தைப் பயன்படுத்த வேண்டும்.

இறைமை சகல இனங்களுக்கும் உரியது. ஒரு இனத்திற்கு மட்டும் உரியதல்ல. இறைமையின் கீழ் ஆட்சியமைக்கும் அதிகாரம் அனைத்து இனங்களுக்கும் இருக்கவேண்டும். எமது பாரம்பரிய வடக்கு, கிழக்குத் தாயகத்தில் எமக்கு சுயாட்சி, அதிகாரம் வழங்கப்பட வேண்டுமென்று தான் கேட்கிறோம்.

எமது உரிமைகளைத் தாருங்கள் என்று தான் தமிழ்மக்கள் கேட்கிறார்கள். மற்றவரின் உரிமையை நாம் கேட்கவில்லை. சர்வதேச சமூகம் யுத்தமற்ற இச்சூழலில் தமிழ்மக்களுக்கு அவர்களின் தாயக பூமியில் சுயாட்சி, அதிகாரம் வழங்கும் தீர்வையே வலியுறுத்தி வருகின்றது. நியாயமான அரசியல் தீர்வொன்றைக் காணவே நாம் கடுமையாக உழைக்கின்றோம்.

காணமுடியாத பட்சத்தில் சர்வதேச சமூகத்தின் துணையை நாடுவோம். இலங்கைத் தமிழர் விடயத்தில் சர்வதேச சமூகம் தொடர்ந்தும் பார்வையாளராக இருக்கமுடியாது. ஐ.நா. சாசனத்தின்படி உள்ளக சுயநிர்ணய உரிமையின் அடிப்படையில் ஒருமித்த தாயகத்தில் சுயாட்சி உரிமை வழங்கப்பட்டாக வேண்டும். அது மறுக்கப்படின் வெளியக சுயநிர்ணய உரிமைக்கு நாம் தகுதி பெறுகின்றோம்.

தமிழ்மக்களைத் தொடர்ந்தும் ஏமாற்ற முடியாது. எமது பிரச்சினைக்கு விரைவில் ஒரு முடிவு வரும். அது எமது கைகளில் தான் தங்கியுள்ளது. யுத்தத்தில் சம்பூர் பிரதேசத்தில் இடம்பெயர்வுக்கு ஆளாகி முகாம்களில் வசிக்கும் மக்கள் தங்களின் பாரம்பரியப் பூமியில் மீள்குடியமர்த்தப்பட வேண்டும்.

இந்தியாவின் உதவியுடன் சம்பூரில் அமைக்கப்படும் அனல்மின் நிலையம் அதற்குத் தடையாக இருக்கக்கூடாது என்று நான் கொழும்புக்கு வந்த இந்திய வெளியுறவுச் செயலாளர் நிருபமாராவிடம் வற்புறுத்தினேன்.

இந்தியா அதனை ஏற்றுக்கொண்டுள்ளது. அனல்மின் நிலையம் சம்பூரில் மீள் குடியேற்றம் இடம்பெறுவதற்குத் தடையாக இருக்காது என்று நிருபமாராவ் உறுதியளித்துள்ளார் என்று சம்பந்தன் கூறினார்.