தமிழ் செய்தி தளம் | சுவிஸ் முரசம் - தேசத்தின் முழக்கம்

2010 ஆம் ஆண்டு நடைபெறவுள்ள பீபா உலகக் கிண்ணக் கால்பந்தாட்டப் போட்டிகள் பிரேஷிலில் நடைபெறவுள்ளதாக  வெளியான செய்திகளை பிரேஷில் கால்பந்தாட்ட சம்மேளனம் மறுத்துரைத்துள்ளது. குறித்த செய்தியில் எந்தவித உண்மையும் இல்லையென்றும்,  போட்டிகளை நடத்துவது தொடர்பில் சிந்திக்கவில்லை என்றும் தெரிவிக்கப்பட்டுள்ளது.

அடுத்த பீபா உலகக்கிண்ண கால்பந்தாட்டத் தொடரை 2010 ஆம் ஆண்டு தென்னாபிரிக்காவில் நடத்த திட்டமிடப்பட்டுள்ளது. ஆனால் உரிய காலத்திற்குள் தென்னாபிரிக்காவில் ஏற்பாடுகள் பூர்த்தியாகா விட்டால் பிரேஷிலுக்கு போட்டித் தொடரை மாற்றப்படலாம் என செய்திகள் வெளியாகின. இது குறித்து பிரேஷில் கால்பந்தாட்டச் சம்மேளனத்தின் பேச்சாளர் ரொட்ரிகோ பாய்வா தெரிவிக்கையில், “இது அபத்தமான கருத்து. அவ்வாறான நிலைமை ஏற்படுவதற்கு வாய்ப்பே இல்லை” என்றார்.

பிரேஷில் கால்பந்தாட்டச் சம்ளேனத்தின் தலைவர் ரிகார்டோ டெய்ஸெய்ரா சர்வதேச கால்பந்தாட்டச் சம்மேளனத்தின் உபதலைவர் ஜெரோம் வால்க் சகிதம் தற்போது பிரான்ஸில் நடைபெறும் உலகக்கிண்ண கடற்கரை கால்பந்தாட்டப் போட்டிகளை பார்வையிடச் சென்றுள்ளார் என்றும், அவர்கள் இருவரும் இவ்வாறான தகவலை அறிந்திருக்கவில்லை என்றும் ரொட்ரிகோ பாய்வா தெரிவித்துள்ளார்.

எனினும், 2014ஆம் ஆண்டு உலகக்கிண்ண கால்பந்தாட்டத் தொடர் பிரேஷில் நடைபெறவுள்ளது. அதற்கான ஏற்பாடுகளை தற்போதிலிருந்து ஆரம்பித்துள்ளதாகவும் தெரிவித்துள்ள ரொட்ரிகோ பாய்வா, “அதற்கான ஏற்பாடுகளே 2012ஆம் ஆண்டளவில் தான் முடிவடையும்” என்றார்.