பீஜிங்கில் நேற்று நடந்த பிரீஸ்டைல் மல்யுத்த போட்டியில் (66 கிலோக் கிராம்) இந்திய வீரர் சுஷில் குமார் களமிறங்கினார். முதல் சுற்றில் உக்ரைன் வீரர் ஆண்ட்ரி ஸ்டாட்னிக் உடன் மோதிய சுஷில் 1:8 என்ற புள்ளிக் கணக்கில் தோற்றார். இதையடுத்து, ‘ரெபசேஜ்’ எனப்படும் மறுமோதல் சுற்றில் சுஷில் கலந்துகொள்ள வாய்ப்பு அளிக்கப்பட்டது.

இந்த சுற்றில், முதலில் அமெரிக்காவின் டெக் ஷ்வாப் உடன் மோதினார். அபாரமாக விளையாடிய சுஷில் 3:1 என்ற கணக்கில் வென்றார். அடுத்து 2வது ‘ரெபசேஜ்’ சுற்றில் பெலாரஸ் வீரர் ஆல்பர்ட் பாட்ரியோவ் உடன் மோதினார். இந்த போட்டியிலும் 3:1 என்ற கணக்கில் வென்று ஆச்சரியத்தை உண்டு பண்ணினார்.

மூன்றாவது சுற்றில், கஷகஸ்தான் வீரர் லெனாய்டு ஸ்பிரிடோனோவ் உடன் சுஷில் மோதினார். லெனாய்டு அரை இறுதிக்கு தகுதிபெற்ற வீரர் என்பது குறிப்பிடத்தக்கது. இப்போட்டி கடும் போராட்டமாக அமைந்தது. 17:22 நிமிடம் நீடித்த இந்த போட்டியில், சுஷில் 3:1 என்ற கணக்கில் வென்று வெண்கலப்பதக்கத்தை தட்டிச் சென்றார். இதனையடுத்து, அவருக்கு, இந்தியாவின் முக்கிய தலைவர்கள், மாநில அரசுகள் வாழ்த்துக்களை தெரிவித்துள்ளதுடன், பரிசில்களையும் அறிவித்துள்ளன.