தமிழ் செய்தி தளம் | சுவிஸ் முரசம் - தேசத்தின் முழக்கம்

பாகிஸ்தானில் பரவிவரும் தீவிரவாதம் கவலை அளிக்கக்கூடியதாக உள்ளதாக அமெரிக்க புலனாய்வுத்துறை எச்சரித்துள்ளது.

இது தொடர்பாக அமெரிக்க புலனாய்வுத் துறை இயக்குநர் மைக்கேல் மெக்கொனல் தெரிவிக்கையில்;

பாகிஸ்தான் அரசை அழிப்பதே தனது இலட்சியமென 2007 கடைசியில் அல்ஹைடா தலைவர் ஒசாமா பின் லேடன் ஒரு கட்டளை பிறப்பித்தார். தனது தலைமையின் கட்டளைக்காக உயிரையும் விடக்கூடிய அர்ப்பண உணர்வுள்ளவர்கள் தீவிரவாத சக்திகளிடம் உள்ளனர். பாகிஸ்தானிடம் அணு ஆயுதம் உள்ளது.

அமெரிக்கர்களை அதிக அளவில் கொல்ல வேண்டும் என நினைப்பவர்களிடம் அணு ஆயுதம் சிக்கினால் அமெரிக்காவின் நிலை என்னவாகும். இது அனைவருக்கும் கவலை அளிக்கிறது.

பாகிஸ்தான் அரசிடம் உள்ள ஆயுதங்கள் அவர்கள் கையில் சிக்காமல் இருப்பது குறித்தே நாம் விழிப்புடன் கண்காணித்து வரவேண்டியுள்ளது.

மேலும், பாகிஸ்தான் பொருளாதாரம் திவாலாகும் நிலையில் உள்ளதுடன், மும்பையில் நடைபெற்ற தாக்குதலுக்கு காரணமானவர்கள் பாகிஸ்தானில் இருந்துதான் வந்துள்ளனர். அவர்களுக்கு பாகிஸ்தானில் பயிற்சியும் அளிக்கப்பட்டுள்ளது.

மும்பை தாக்குதலுக்குப் பின் இரு நாடுகளுக்கு இடையே பதற்றம் அதிகரித்துள்ளது. இரு நாட்டு எல்லைகளிலும் படைகளைக் குவித்து தயார் நிலையில் உள்ளனர்.

இரு நாடுகளும் பதற்றத்தை எப்படிக் குறைக்கப் போகின்றன எனத் தெரியவில்லை எனத் தெரிவித்தார்.